dil-e-bad-guman ke tavahhumat ajiib hain
mire naam ke ye huruf saat ajiib hain
na taḳhaiyyulat giraft-e-harf men aa sake
ye nuzul-e-sher ki mushkilat ajiib hain
tu talash kar koi aur ilaj-e-dil-e-hazin
ki dava-e-ishq ke muzmirat ajiib hain
tire fikr ke bhi hain zaviye sabhi munfarid
tiri guftugu ki sabhi jihat ajiib hain
ik anokhe dard ke paḌ rahe hain bhanvar yahan
abhi bahr-e-gham men tamavvujat ajiib hain
na faqih koi samajh saka na hi to sanam
ki ḳhuda se mere muamalat ajiib hain
sabhi manzaron ko ye dam-ba-ḳhud hain kiye hue
ye tiri nazar ke tahayyurat ajiib hain
tiri tishnagi isi dast-e-zad ki muntazir
dil-e-ḳhush-guman tiri ḳhvahishat ajiib hain
Leave a Reply