Irada Tha Ki Ab Ke Rang-E-Duniya Dekhna Hai

Hasan Abbas Raza

irada tha ki ab ke rang-e-duniya dekhna hai

ḳhabar kya thi ki apna hi tamasha dekhna hai

Dasega bebasi ka naag jaane aur kab tak

na jaane aur kitne din ye naqsha dekhna hai

dua ka shamiyana bhi nahin hai ab to sar par

so ḳhud ko hiddat-e-gham men jhulasta dekhna hai

nahin ab sochna kya ho chuka kya hoga aage

bas ab to haath ki rekha ka likkha dekhna hai

bahut dekha hai ḳhud ko ranj par taqsim hote

aur ab taqsim-dar-taqsim hota dekhna hai

main phir ik ḳhat tire angan girana chahta huun

mujhe phir se tira rang-e-burida dekhna hai

tu sar-ta-pa zabani yaad ho ja.egi mujh ko

ki ab main ne tujhe itna ziyada dekhna hai

‘hasan’ main ek lambi saans lena chahta huun

main jaisa tha kisi din ḳhud ko vaisa dekhna hai