makānoñ ke nagar meñ ham agar kuchh ghar banā lete
to apnī bastiyoñ ko sovarg se baḌh kar banā lete
hameñ apne ilāqoñ se mohabbat ho nahīñ paa.ī
vagarna zindagī ko aur bhī behtar banā lete
samay se laḌ rahe the aur lamhe kar diye barbād
hameñ karnā ye thā lamhāt kā lashkar banā lete
ġhanīmat hai ki jañgal ke usūloñ ko nahīñ maanā
vagarna āshiyānoñ ko ajā.ib-ghar banā lete
agar saudā hī karnā thā use to bol to detā
mohabbat ke liye ham dil ko bhī daftar banā lete
havas hairāñ na kar paatī talab tanhā na kar paatī
agar ham hasratoñ ko pyaar kā sāgar banā lete
kahīñ aisā jo ho paatā ki laḌte hī nahīñ ham tum
bahut mumkin thā har kañkar ko shīv-shañkar banā lete