Saleem Figar
har qadam agahi ki samt gaya
main sada raushni ki samt gaya
lafz le kar ḳhayal ki vus.at
sher ki tazgi ki samt gaya
main jo utra lahad ke ziine se
ik na.i zindagi ki samt gaya
tishnagi ko main apne saath liye
dasht-e-avargi ki samt gaya
kachche rangon ki is numa.ish se
main uTha sadgi ki samt gaya
nutq phir tazgi ki ḳhvahish men
gosha-e-ḳhamoshi ki samt gaya
Leave a Reply