Poet
hain kashmakash men aaj tiri dastan se ham
ai dil shurua karen ye hikayat kahan se ham
tera ḳhulus teri mohabbat tiri nazar
kis tarah chhin laa.en mah-o-kahkashan se ham
nazan hai koi apne taghaful pe marhaba
majbur ho rahe dil-e-naz-dan se ham
josh-e-junun ne thaam liya hai ḳhulus hai
guzre qadam qadam pe na.e imtihan se ham
qaht-e-vafa men valvala-e-jan fana hua
kya bad-guman hain aaj kisi razdan se ham
ye to ḳhizan-nasib baharon se puchhiye
vabasta-e-ḳhulus rahe gulistan se ham
mahsus ho raha hai ki manzil qarib hai
kuchh duur ja chuke hain faza-e-jahan se ham
uf vus.at-e-nigah-e-taḳhayyul na puchhiye
so asman-buland hain is asman se ham
ye dastan-e-gham hi mata-e-‘aziz’ hai
duniya basa rahe hain gham-e-javedan se ham
Leave a Reply