Sahar Jab Muskurai Tab Kahin Taron Ko Nind Aai

Shmashad Shad

sahar jab muskura.i tab kahin taron ko niind aa.i

bahut mushkil se kal shab dard ke maron ko niind aa.i

suna hai shaam se hi taak men baiThe hain sab gulchin

qayamat gul pe aa.egi agar ḳharon ko niind aa.i

hamesha zehn-o-dil men kuchh na kuchh chalta hi rahta hai

hue jo fikr se ḳhali to fankaron ko niind aa.i

azal se puuri shiddat se ḳhalaon men muallaq hain

kabhi tum ne suna hai ye ki sayyaron ko niind aa.i

musalsal naz-bardari se aajiz aa chuka tha main

chalo achchha hua kam-baḳht azaron ko niind aa.i

ye taḳhliqi anasir varna masruf-e-amal hi the

ga.i jo ruuh us aalam men to charon ko niind aa.i

vagarna ‘shad’ be-ḳhvabi men guzri zindagi un ki

ruka jab karvan-e-zist banjaron ko niind aa.i