Allah Agar Taufiq Na de Insan Ke Bas Ka Kaam Nahin

Jigar Moradabadi

allah agar taufiq na de insan ke bas ka kaam nahin

faizan-e-mohabbat aam sahi irfan-e-mohabbat aam nahin

ye tu ne kaha kya ai nadan fayyazi-e-qudrat aam nahin

tu fikr o nazar to paida kar kya chiiz hai jo inaam nahin

ya-rab ye maqam-e-ishq hai kya go dida-o-dil nakam nahin

taskin hai aur taskin nahin aram hai aur aram nahin

kyuun mast-e-sharab-e-aish-o-tarab taklif-e-tavajjoh farmaen

avaz-e-shikast-e-dil hi to hai avaz-e-shikast-e-jam nahin

aana hai jo bazm-e-janan men pindar-e-khudi ko tod ke aa

ai hosh-o-khirad ke divane yaan hosh-o-khirad ka kaam nahin

zahid ne kuchh is andaz se pi saaqi ki nigahen padne lagin

mai-kash yahi ab tak samjhe the shaista daur-e-jam nahin

ishq aur gavara khud kar le be-shart shikast-e-fash apni

dil ki bhi kuchh un ke sazish hai tanha ye nazar ka kaam nahin

sab jis ko asiri kahte hain vo to hai amiri hi lekin

vo kaun si azadi hai yahan jo aap khud apna daam nahin