sang ik aur gira dil ke nihan-ḳhane men
ashk girte hi rahe phir use bahlane men
main samajh paa.i na ai dil rahi ye kis ki ḳhata
aa ga.i kyon main tire daam men anjane men
us ki baton men agarche thi vafa ki ḳhushbu
der phir bhi na lagi dhoka mujhe khane men
jhuuT ko deta hai vo sach ka labada kaisa
lutf aata hai bahut us ke is afsane men
farq kya mujh ko paḌa ek shikast aur sahi
hai ajab sa hi nasha maat ke kha jaane men
sharmsar apne kahe par nahin hai ‘fatima’ vo
sharm aati hai use apne hi sharmane men
Leave a Reply