Sang Ek Aur Gira Dil Ke Nihan-KHane Mein

sañg ik aur girā dil ke nihāñ-ḳhāne meñ

ashk girte hī rahe phir use bahlāne meñ

maiñ samajh paa.ī na ai dil rahī ye kis kī ḳhatā

aa ga.ī kyoñ maiñ tire daam meñ anjāne meñ

us kī bātoñ meñ agarche thī vafā kī ḳhushbū

der phir bhī na lagī dhokā mujhe khāne meñ

jhuuT ko detā hai vo sach kā labāda kaisā

lutf aatā hai bahut us ke is afsāne meñ

farq kyā mujh ko paḌā ek shikast aur sahī

hai ajab sā hī nasha maat ke khā jaane meñ

sharmsār apne kahe par nahīñ hai ‘fātima’ vo

sharm aatī hai use apne hī sharmāne meñ

Leave a Comment