naghme taḌap rahe hain dil-e-be-qarar men
ankhen baras rahi hain gham-e-intizar men
fitrat udaas si hai ghaTa.en hain sogvar
ik gham-nasib husn hai abr-e-bahar men
hai zarra zarra shauq-e-sama.at se be-qarar
tum gunguna rahe ho kisi abshar men
savan ki rut bahar ka mausam andheri raat
rim-jhim ke giit guunj rahe hain phuvar men
sapnon men ho gaya hai savera kahin mujhe
baiTha hua huun jaise kisi lala-zar men
aisa laga ki saath hi gaate hain abshar
kya mohni si lai hai tumhare sitar men
kyuun aaj sar jhuka.e hue ro rahe ho tum
bikhre hue hain baal gham-o-intishar men
Leave a Reply