pichha hi nahin chhoḌti ghar baar ki ḳhushbu
raste se ayaan hai dar-o-divar ki ḳhushbu
kab kaise kahan se bani pur-pech gali men
bechain kiye rahti hai asrar ki ḳhushbu
main apne tasavvur men huun ḳhush-hal baradar
qadmon men paḌi hai mire darbar ki ḳhushbu
tum ajnabi qadmon se nikal jaao musafir
paana hai kisi aur ko gulzar ki ḳhushbu
ashkon ke jharoke men bhi dar aa.i hai aksar
hairan tabassum men basi yaar ki ḳhushbu
ik gul pe qana.at hai kahan bahti hava ko
har-vaqt liye phirti hai do-char ki ḳhushbu
barson jo rahi dafn kisi zaḳhm-e-jigar men
paa.el se ugi aaj vo jhankar ki ḳhushbu
avaz pe takiya na lagana kabhi ‘ja.afar’
ḳhamosh sada deti hai us paar ki ḳhushbu
Leave a Reply