dar-o-bast-e-anasir paara paara hone vaala hai
jo pahle ho chuka hai phir dobara hone vaala hai
guman-e-mahr men ye baat hi shayad nahin hogi
huvaida ḳhaak se bhi ik sharara hone vaala hai
kinara kar na ai duniya miri hast-e-zabuni se
koi din men mira raushan sitara hone vaala hai
pighalne ja raha hai phir se bahr-e-munjamid koi
samundar hi samundar ka kinara hone vaala hai
bahut maḳhfi jise rakkha gaya tha chashm-e-imkan se
abhi kuchh din men us ka bhi nazara hone vaala hai
hamin hain us ki ninden aur hamin us ke nigahban hain
hamare ḳhvab par kis ka ijara hone vaala hai
vahi ‘tariq’-nai.im ab is qafas ke baab kholega
kisi ki aankh se jo ik ishara hone vaala hai
Leave a Reply