Zafar Kaleem
nava-e-haq pe huun qatil ka Dar aziiz nahin
paḌe jihad to apna bhi sar aziiz nahin
paḌa hua huun sar-e-rahguzar to rahne de
tiri gali se ziyada to ghar aziiz nahin
faqir-e-shahr ko la.al-o-guhar se kya nisbat
mire aziiz mujhe mal-o-zar aziiz nahin
phalon ko luuT ke le jaao peḌ mat kaaTo
shajar aziiz hai mujh ko samar aziiz nahin
vo log ham se alag apna rasta kar len
ki jin ko shahr-e-vafa ka safar aziiz nahin
bahut aziiz hain mujh ko mohabbaten lekin
mohabbaton men siyasat ‘zafar’ aziiz nahin
Leave a Reply