Khaleel Rampuri
naqsh vo aankh men utra tha ki jaata hi na tha
main ne is dhuup ko Dhalte kahin dekha hi na tha
ruuh ki pyaas bujha.e na bujhegi kisi Dhang
mujh ko is dasht ki pahna.i men ugna hi na tha
pahle is ghar ki har ik khiḌki khuli rahti thi
yuun mila karte the jaise koi parda hi na tha
ab jo insan havaon men uḌa phirta hai
ye kabhi peḌ ke saa.e se nikalta hi na tha
dauḌ paḌta tha jahan ret se jalte the qadam
saath dariya tha magar Dar se utarta hi na tha
aisi sardi men vahan ja ke kahan susta.e
paar naddi ke koi dhuup ka ḳhema hi na tha
raat ka peḌ uga tha ki koi saaya tha
kya kahun haath laga kar use dekha hi na tha
kitne azad the barsat ke ḳhud-rav naale
apni duniya thi koi puchhne vaala hi na tha
hadisa aisa bhi pesh aa.ega mar ja.unga
ḳhvab aisa to kabhi umr men dekha hi na tha
sha.iri ne mujhe insan banaya hai ‘ḳhalil’
main vo shisha tha ki duniya se chamakta hi na tha
Leave a Reply