ufuq par kaisa badal chha raha hai
andhera raushni ko kha raha hai
talash-e-saya men phir aao niklen
tanavar peḌ kaaTa ja raha hai
ye mauzu-e-suḳhan Thahra hai goya
gharon ko kaun kyunkar Dha raha hai
hadis-e-mausam-e-gul kya vo samjhen
jinhen ḳhun-rang manzar bha raha hai
dil-e-sha.ir dil-e-divana Thahra
hujum-e-shauq men ghabra raha hai
baras jaa.e to dukh ki gird baiThe
jo TukḌa abr ka manDla raha hai
Leave a Reply