Ufuq Par Kaisa Baadal Chha Raha Hai

ufuq par kaisā bādal chhā rahā hai

añdherā raushnī ko khā rahā hai

talāsh-e-sāya meñ phir aao nikleñ

tanāvar peḌ kaaTā jā rahā hai

ye mauzū-e-suḳhan Thahrā hai goyā

gharoñ ko kaun kyūñkar Dhā rahā hai

hadīs-e-mausam-e-gul kyā vo samjheñ

jinheñ ḳhūñ-rañg manzar bhā rahā hai

dil-e-shā.ir dil-e-dīvāna Thahrā

hujūm-e-shauq meñ ghabrā rahā hai

baras jaa.e to dukh kī gird baiThe

jo TukḌā abr kā mañDlā rahā hai

Leave a Comment