Kaise Kahin Ki Jaan Se Pyara Nahin Raha

kaise kahin ki jaan se pyara nahin raha

ye aur baat ab vo hamara nahin raha

aansu tire bhi khushk hue aur mere bhi

nam ab kisi nadi ka kinara nahin raha

kuchh din tumhare laut ke aane ki aas thi

ab is ummid ka bhi sahara nahin raha

raste mah-o-nujum ke tabdil ho gae

in khidkiyon men ek bhi taara nahin raha

samjhe the dusron se bahut mukhtalif tujhe

kya maan len ki tu bhi hamara nahin raha

hathon pe bujh gai hai muqaddar ki kahkashan

ya raakh ho gaya vo sitara nahin raha

tum eatibar us ke liye kyuun udaas ho

ik shakhs jo kabhi bhi tumhara nahin raha

Leave a Comment