Bakhsh Layalpuri
ataq-e-shab men sahar ke charagh raushan kar
qaba-e-dil hi nahin dil ke daagh raushan kar
kisi tariq se taaza hava giraft men la
kisi sabil se apna dimagh raushan kar
masham-e-jan men basa ḳhair-o-amn ki ḳhushbu
phir is mahak se mohabbat ke baagh raushan kar
chhiḌak ke ḳhuun rag-e-dil haqir zarron par
savad-e-manzil-e-jan ke suragh raushan kar
salib uTha ke kabhi kucha-e-sitam men bhi chal
junun ki lau se bhi dasht-e-charagh raushan kar
rah-e-hayat men vahm-o-guman ke saa.e hain
nazar men azm-o-yaqin ke ayagh raushan kar
kabhi taqaddus-e-insan ke tu giit bhi ga
kabhi to dil men mohabbat ki aag raushan kar
Leave a Reply