jo ḳhaas bande hain vo banda-e-avam nahin
hazar baar jo yusuf bike ghulam nahin
bhala ho kya dil zahid men soz-e-ulfat-e-haq
kabhi jalane ke qabil charagh-e-ḳham nahin
gila hai chashm-e-suḳhan-go se ḳhamushi ka hamen
dahan ke hone na hone men kuchh kalam nahin
tu aftab hai zulf-e-siyah nahin to na ho
charagh-e-roz ko kuchh ehtiyaj-e-sham nahin
aziiz ashiq-e-gumnam ka hai dil us ko
nagin vo haath men rakhta hai jis men naam nahin
bas ek haath men do ho ke paḌh dogana-e-ishq
jo be-namaz hai vo qabil-e-salam nahin
ye sar jhukana ye munh pherna hai maan.e diid
miri namaz men sajda nahin salam nahin
vo mujh pe marne lagi jo hai mire darpai-e-qatl
ilahi is ke siva aur intiqam nahin
firaq-e-yar men dast-e-subu uḌate hain ḳhaak
ye gard-bad hai gardish men apna jaam nahin
na hans rula.ega tujh ko ḳhumar-e-bada-e-aish
mai-nashat to is bazm men mudam nahin
phanse na qaid-e-ta.alluq men jo ki hai azad
chaman men ta.ir-e-nik.hat asir-e-dam nahin
vo dil ho chaak nahin ishq ka nishan jis men
nagin vo TuuTe mohabbat ka jis men naam nahin
rahega hijr ka din kab kaTe agar shab-e-vasl
mudam roz-e-qayamat ko bhi qayam nahin
bane jo baal ka phanda tumhari tegh ka baal
to murgh-e-jan ke liye behtar is se daam nahin
mai-do-atisha-e-kufr-o-din se ḳhalq hai mast
magar sharab ye ham-mashrabo haram nahin
pukara apna gada kah ke mujh ko ai shah-e-husn
faqir huun tire dar ka ‘vazir’ naam nahin
Leave a Reply