Poet
main bhi be-ant huun aur tu bhi hai gahra sahra
ya Thahar mujh men ya ḳhud men mujhe Thahra sahra
ruuh men lahr banate hain tiri lahron se
aur kuchh der mire samne lahra sahra
aankh jhapki thi bas ik lamhe ko aur is ke ba.ad
main ne DhunDa hai tujhe zindagi sahra sahra
apni hasti ko bikharne se bacha lena tum
mujh pe mat jaana miri jaan main Thahra sahra
mere lahje ka samundar hi nahin sukha hai
luT gaya teri hansi ka bhi sunahra sahra
Leave a Reply