ab nibhani hi paḌegi dosti jaisi bhi hai
aap jaise bhi hain niyyat aap ki jaisi bhi hai
khul chuki hain us ke ghar ki khiḌkiyan mere liye
ruḳh miri janib rahega be-ruḳhi jaisi bhi hai
choTiyan chhu kar guzarte hain baraste kyuun nahin
badalon ki ek surat aadmi jaisi bhi hai
ajnabi shahron men tujh ko DhunDhta huun jis tarah
ik gali har shahr men teri gali jaisi bhi hai
aaj ke dukh hi bahut hain bim-e-farda kis liye
kaT hi ja.egi aziyyat ki ghaḌi jaisi bhi hai
dhundla dhundla hi sahi rasta dikha.i to diya
aaj ka din hai ghanimat raushni jaisi bhi hai
jhulti hai mere dil men ek shaḳh us peḌ ki
vo tar-o-taza hai ya sukhi hui jaisi bhi hai
main ne dekha hai falak ko jagte sote hue
meri ankhon tak to aa.i chandni jaisi bhi hai
ab kahan le jaa.en sanson ki sulagti aag ko
zindagi hai zindagi achchhi buri jaisi bhi hai
koi mausam ho miri ḳhushbu rahe is phuul men
dastan meri kahi ya an-kahi jaisi bhi hai
apna haq ‘shahzad’ ham chhinenge mangenge nahin
rahm ki talib nahin be-chargi jaisi bhi hai
Leave a Reply