manzil-e-marg men jiine ki ada rakhta huun
ya.ani har haal men andaz juda rakhta huun
juz hava koi nahin munis-o-gham-ḳhvar magar
rat-bhar kamre ka darvaza khula rakhta huun
apni fitrat ko sikhata huun ghulami teri
mauj-e-azad ko zanjir-ba-pa rakhta huun
gum huun qatre ki tarah vaqt ke dariya men magar
apni hasti ka tilismat juda rakhta huun
zer-e-pa hain mire sahraon ke jalte maidan
sar pe alam ke sho.alon ki rida rakhta huun
bahr-e-azar bhi hai hadd-e-nazar tak raqsan
jazba-e-shauq agar had se siva rakhta huun
meri fariyad pe kab bab-e-inayat khula
haa.e kis munh se kahun main bhi ḳhuda rakhta huun
gham na kar tu hai agar ḳhu-e-ḳharabi ka asiir
main bhi alam se paiman-e-vafa rakhta huun
kyuun nahin aks-e-abad men bhi samundar jaisa
naqsh-bar-ab huun ḳhaliq se gila rakhta huun
‘arsh’ main ḳhud huun sada apne sukun ka dushman
dasht-e-ummid bhi bar-dosh-e-hava rakhta huun
Leave a Reply