Kuchh Is Qadar Main KHirad Ke Asar Mein Aa Gaya Hun

Rajesh Reddy

kuchh is qadar main ḳhirad ke asar men aa gaya huun

simaT ke saara ka saara hi sar men aa gaya huun

zamin uchhal chuki asman ne thama nahin

main ka.enat men bilkul adhar men aa gaya huun

ye zindagi bhi mire hauslon pe hairan hai

samajh rahi thi ki main us ke Dar men aa gaya huun

zara sa fasla main ne bhi tai kiya to hai

agar se do qadam aage magar main aa gaya huun

miri shanaḳht ki ḳhatir chhapi miri tasvir

na jite-ji sahi mar ke ḳhabar men aa gaya huun

udaas ho gaya huun phir se ik zara hans kar

men ghum-gham ke phir apne ghar men aa gaya huun

na aa saka main tire haath ki lakiron men

yahi bahut hai tiri chashm-e-tar men aa gaya huun

ye soch kar ki na duun naḳhuda ko ye zahmat

utar ke kashti se ḳhud hi bhanvar men aa gaya huun

chhupa na paaya kabhi ḳhud ko apne sheron men

main jo huun jaisa huun apne hunar men aa gaya huun