miri baton pe duniya ki hansi kam hoti jaati hai
miri divangi shayad musallam hoti jaati hai
tavajjoh ki nazar meri taraf kam hoti jaati hai
main ḳhush huun ishq ki buniyad mohkam hoti jaati hai
zarurat kuchh bhi kahne ki bahut kam hoti jaati hai
miri surat hi ab shauq-e-mujassam hoti jaati hai
kabhi tu ne pukara tha mujhe kuchh shak sa hota hai
mire kanon men ik avaz paiham hoti jaati hai
mujhe samjhane aa.e hain ki main rone se baaz aa.uun
mire samjhane valon ki nazar nam hoti jaati hai
abhi sun lo to shayad sun sako tum dil ke naghmon ko
ki ab us ki sada kuchh ḳhud-ba-ḳhud kam hoti jaati hai
vahi dil hai magar ab vo nahin agli si betabi
vahi ḳhuun hai magar raftar maddham hoti jaati hai
tujhe maz.hab miTana hi paḌega ru-e-hasti se
tire hathon bahut tauhin-e-adam hoti jaati hai
nashat-e-zist ki zamin hai ab yad-e-mohabbat hi
yahi ḳhud ishq ke zaḳhmon ka marham hoti jaati hai
mohabbat hi se kholo tum dil-e-‘mulla’ ka darvaza
yahi is ke liye ab ism-e-azam hoti jaati hai
Leave a Reply