vahi kuchh zindagi men zindagi ka bhed paate hain
jo paiham justuju karte hain barson gham uThate hain
jo sach puchho to ḳhud jiite hain aur jiina sikhate hain
vo divane jo har tufan-e-gham men muskurate hain
kuchh is andaz se vo apni mahfil men bulate hain
ki insan ke qadam uThne se pahle kaanp jaate hain
vo pichhli shab ko apne ruḳh se jab parda uThate hain
mira ehsas shahid hai do-alam jhuum jaate hain
ta.ajjub kyon hai meri be-ḳhudi par ahl-e-mahshar ko
vo jis ko bhi pilate hain kuchh aisi hi pilate hain
nahin kuchh ḳhak-e-dil lekin pahunch kar un ke daman tak
yahi zarre mah-o-ḳhurshid ban kar jagmagate hain
mohabbat ibtida ta-intiha irfan-e-kamil hai
magar ham to unhen paane se pahle kho.e jaate hain
tira kucha hi kyon rah rah ke paiham yaad aata hai
isi aalam men aalam aur bhi to paa.e jaate hain
shikayat kar rahe ho ‘kaif’ tum ko shukr lazim hai
vo mushkil se kisi ko apna divana banate hain
Leave a Reply