Jab Tere KHwab Se Bedar Hua Karte The

Azhar Abbas

jab tire ḳhvab se bedar hua karte the

ham kisi ranj se do-char hua karte the

aa.ine chashm-e-tahayyur se hamen dekhte the

ham ki jab tere giraftar hua karte the

aaj ma.alum hua teri zarurat hi na thi

ham yunhi tere talabgar hua karte the

ab to ham roz unhen paanv tale raundte hain

ye hi raste the jo dushvar hua karte the

daulat-e-ishq se ham kaam chalate the miyan

bas yahi dirham-o-dinar hua karte the

barha yuun bhi hua Duube hue ḳhvab mire

us ki ankhon se numudar hua karte the

aap hi aap kahani se nikalte jaate

jo mire jaise adakar hua karte the

lo ki ham bojh uThate hain zamin se apna

ham kabhi is pe bahut baar hua karte the

aaj jo log ḳharidar hain tere ‘az.har’

kal yahi mere ḳharidar hua karte the