Asad Badayuni
ḳhaak to ham bhi har ik dasht ki chhane hue hain
kuchh naya karne ki koshish men purane hue hain
sabz mausam ka pata jin se mila karta tha
tira-baḳhton ke vahi shahr Thikane hue hain
ḳhana-e-dil men abhi tak hain vahi log abad
jin ko ojhal hue ankhon se zamane hue hain
tiir shaḳhon men hain paivast parindon men nahin
kis shikari ke ḳhata itne nishane hue hain
ab-o-gil hi ka karishma lab-o-ruḳhsar bhi hain
aisi kya baat hai kyuun aap divane hue hain
roz mat mangiye miTTi ki mohabbat ka subut
ham to ye jism usi ḳhaak ka chhane hue hain
sher bhi likhta huun aur ghar bhi chalata huun janab
kab kisi bojh ke shaki mire shane hue hain
Leave a Reply