Fughan-E-Dard Mein Bhi Dard Ki Khalish Hi Nahin

fughan-e-dard men bhi dard ki khalish hi nahin

dilon men aag lagi hai magar tapish hi nahin

kahan se laaen vo soz-o-gudaz dil vaale

ki dilbari ka vo ahang vo ravish hi nahin

haqiqaton ke bhi tevar badal to sakte hain

hamari bazm men khvabon ki vo khalish hi nahin

dimagh kyuun na ho sahil pe sone valon ka

kabhi kabhar jo tufan ki sarzanish hi nahin

lubhaega use kya chand ka khunuk jaadu

jise nasib kadi dhuup ki tapish hi nahin

zamana qissa-e-dar-o-rasan ko bhuul na jaae

kisi ke halqa-e-gesu men vo kashish hi nahin

ye rang-o-bu ke tilismat kis liye hain ‘surur’

bahar kya hai junun ki jo parvarish hi nahin

Leave a Comment