Azmaten Sab Teri Khudai Ki

azmaten sab tiri khudai ki

haisiyat kya miri ikaai ki

mire honton ke phuul suukh gae

tum ne kya mujh se bevafai ki

sab mire haath paanv lafzon ke

aur ankhen bhi raushnai ki

main hi mulzim huun main hi munsif huun

koi surat nahin rihai ki

ik baras zindagi ka biit gaya

tah jami ek aur kaai ki

ab taraste raho ghazal ke liye

tum ne lafzon se bevafai ki

Leave a Comment