Urdu

hamari pyari zaban urdu

hamari naghmon ki jaan urdu

hasin dilkash javan urdu

zaban vo dhul ke jis ko ganga ke jal se pakizgi mili hai

avadh ki thanDi hava ke jhonke se jis ke dil ki kali khili hai

jo sher-o-naghma ke ḳhuld-zaron men aaj koyal si kukti hai

isi zaban men hamare bachpan ne maaon se loriyan suni hain

javan ho kar isi zaban men kahaniyan ishq ne kahi hain

isi zaban ko chamakte hiron se ilm ki jholiyan bhari hain

isi zaban se vatan ke honton ne naara-e-inqilab paaya

isi se angrez hukmaranon ne ḳhud-sari ka javab paaya

isi se meri javan tamanna ne shaeri ka rabab paaya

ye apne naghmat-e-pur-asar se dilon ko bedar kar chuki hai

ye apne naaron ki fauj se dushmanon pe yalghar kar chuki hai

sitamgaron ki sitamgari par hazar-ha vaar kar chuki hai

koi batao vo kaun sa mod hai jahan ham jhijak gae hain

vo kaun si razm-gah hai jis men ahl-e-urdu dubak gae hain

vo ham nahin hain jo badh ke maidan men aae hon aur thithak gae hain

ye vo zaban hai ki jis ne zindan ki tirgi men diye jalae

ye vo zaban hai ki jis ke shoalon se jal gae phansiyon ke saae

faraz-e-dar-o-rasan se bhi ham ne sarfaroshi ke giit gaae

kaha hai kis ne ham apne piyare vatan men bhi be-vatan rahenge

zaban chhin jaegi hamare dahan se ham be-suḳhan rahenge

ham aaj bhi kal ki tarah dil ke sitar par naghma-zan rahenge

ye kaisi bad-e-bahar hai jis men shaḳh-e-urdu na phal sakegi

vo kaisa ru-e-nigar hoga na zulf jis par machal sakegi

hamen vo azadi chahiye jis men dil ki miina ubal sakegi

hamen ye haq hai ham apni ḳhak-e-vatan men apna chaman sajaen

hamari hai shaḳh-e-gul to phir kyuun na us pe ham ashiyan banaen

ham apne andaz aur apni zaban men apne giit gaaen

kahan ho matvalo aao bazm-e-vatan men hai imtihan hamara

zaban ki zindagi se vabasta aaj suud o ziyan hamara

hamari urdu rahegi baaqi agar hai hindostan hamara

chale hain gang-o-jaman ki vaadi men ham hava-e-bahar ban kar

himaliya se utar rahe hain tarana-e-abshar ban kar

ravan hain hindostan ki rag rag men ḳhuun ki surḳh dhaar ban kar

hamari pyari zaban urdu

hamari naghmon ki jaan urdu

hasin, dilkash javan urdu

Leave a Comment