Iftikhar Arif
junun ka rang bhi ho shola-e-numu ka bhi ho
sukut-e-shab men ik andaz guftugu ka bhi ho
main jis ko apni gavahi men le ke aaya huun
ajab nahin ki vahi aadmi adu ka bhi ho
vo jis ke chak-e-gareban pe tohmaten hain bahut
usi ke haath men shayad hunar rafu ka bhi ho
vo jis ke Dubte hi naav Dagmagane lagi
kise ḳhabar vahi taara sitara-ju ka bhi ho
subut-e-mohkami-e-jan thi jis ki burrish-naz
usi ki tegh se rishta rag-e-gulu ka bhi ho
vafa ke baab men kar-e-suḳhan tamam hua
miri zamin pe ik ma.arka lahu ka bhi ho
Leave a Reply