kisi ki yaad men likkha hai jo kuchh
yahi kuchh hai mira apna hai jo kuchh
usi ka aks hai lafzon men mere
nazar ke samne duniya hai jo kuchh
zarurat-mand huun mujh ko ata kar
sakhi daata mira hissa hai jo kuchh
chura le ja.egi bad-e-saba bhi
chhupa kar phuul ne rakkha hai jo kuchh
muqaddar hai isi ka naam shayad
mujhe vo be-talab deta hai jo kuchh
bata dengi hava.en har kisi ko
lab-e-ashjar par qissa hai jo kuchh
mah-o-ḳhurshid to kuchh bhi nahin hain
miri miTTi ka ik zarra hai jo kuchh
kisi din vo bhi le ja.ega koi
sar-e-bazar-e-jan sauda hai jo kuchh
kahan tak main tajassus men rahunga
uTha do darmiyan parda hai jo kuchh
nahin sujha jo ab us ka abhi tak
kisi ki aankh ne puchha hai jo kuchh
nahin kuchh aur paane ki tamanna
ghanimat hai yahan paaya hai jo kuchh
use tahrir karta ja raha huun
miri sochon ka afsana hai jo kuchh
bhanvar hon ya ḳhas-o-ḳhashak ‘shahid’
hamara hai sar-e-dariya hai jo kuchh
Leave a Reply