Ahmad Fareed
din se bichhdi hui barat liye phirti hai
chand taron ko kahan raat liye phirti hai
ye kahin us ke mazalim ka mudava hi na ho
ye jo patton ko hava saath liye phirti hai
chalte chalte hi sahi baat to kar li jaae
ham ko duniya men yahi baat liye phirti hai
lamha lamha tiri furqat men pighalti hui umr
garmi-e-shauq-e-mulaqat liye phirti hai
varna ham shahr-e-gul-azar men kab aate the
ye to ham ko bhari-barsat liye phirti hai
jis taraf se main guzarta bhi nahin tha pahle
ab vahin gardish-e-halat liye phirti hai
Leave a Reply