Qawi Dil Shadman Dil Parsa Dil

qavi dil shadman dil parsa dil

tire ashiq ne bhi paaya hai kya dil

laga do aag uzr-e-maslahat ko

ki hai be-zar is shai se mira dil

jafakari hai taslim-e-sitam bhi

na hoga taba-e-jaur-o-jafa dil

laga kar aankh is jan-e-jahan se

na hoga ab kisi se ashna dil

mite afkar-e-gona-gon ke jhagde

tire gham ko na de kyunkar dua dil

na pahunchegi kabhi kya gosh-e-gul tak

qafas se ud ke fariyad-e-ana dil

tu ana-e-sadaqat hai to hargiz

na hoga pairav-e-batil mira dil

badi dargah ka saail huun ‘hasrat’

badi ummid hai meri bada dil

Leave a Comment