Ameer Raza Mazhari
agarche sho.ala ayaan nahin hai agarche lab par dhuan nahin hai
nihan jise ham samajh rahe hain vo aag dil ki nihan nahin hai
ye raah vo hai ki har musafir ke tajarbe jis men muḳhtalif hain
vo kaun insan hai zindagi jis ki ik na.i dastan nahin hai
kidhar ko jaa.en kise pukaren muḌen ki aage hi baḌhte jaa.en
ghubar ka bhi tire sahara hamen to ai karvan nahin hai
zara ye sahra ko jaane valon se koi puchhe kahan chale tum
kahin hai koi zamin aisi jahan pe ye asman nahin hai
vo mehrban ho to vasvasa ye ki mehrbani ye daf.atan kyon
vo sargiran hai to hai ye hasrat ki haa.e vo mehrban nahin hai
ye dil ki paiham si be-qarari nazar ki harkat-e-iztirari
aur us pe israr-e-parda-dari ki jaise vo raz-dan nahin hai
vahi hikayat dil-o-nazar ki vahi kahani hai chashm-e-tar ki
‘raza’ ye meri ghazal-sara.i na.i koi dastan nahin hai
Leave a Reply