Dasht Ki Pyas baDhane Ke Liye Aae The

dasht ki pyaas baḌhane ke liye aa.e the

abr bhi aag lagane ke liye aa.e the

aise lagta hai ki ham hi se koi bhuul hui

tum kisi aur zamane ke liye aa.e the

apni pathra.i hui ankhon ko jhapken kaise

jo tira aks churane ke liye aa.e the

mauj-dar-mauj hua ab-e-ravan qaus-e-quzah

taare ankhon men nahane ke liye aa.e the

log kahte hi rahe ‘sad’ batao kuchh to

ham ki bas ashk bahane ke liye aa.e the