Sultan Akhtar
niind TuuTi to samundar na jazira dekha
raat bhi main ne vahi ḳhvab-e-shikasta dekha
sab pareshan hain lamhon ki giranbari se
main ne har shaḳhs ke mathe pe pasina dekha
us ne sahmi hui ankhon pe hatheli rakh li
jab ḳhas-e-jism se uThta hua sho.ala dekha
goshe goshe men kisi ḳhauf ki parchha.in thi
ghar ki har chiiz pe aaseb ka saaya dekha
sab ki peshani pe halat ki tariki thi
sab ke honTon pe kaḌe vaqt ka nauha dekha
koi tahzib bhi sa.ista-e-malbus nahin
jis ko bhi dekha sar-e-rah barahna dekha
hans ke milne se tasanno ki chamak chhup na saki
haa.e vo chehra jo main ne pas-e-chehra dekha
Leave a Reply