ishq jab manzil-e-aḳhir se guzarta hoga
ek bhi ashk na ankhon se Tapakta hoga
ham to jab janen ki jab vaqt hamara badle
log kahte hain badalta hai badalta hoga
hoga ai dost yaqinan vo mire dil ki tarah
jo diya ruḳh pe havaon ke bhi jalta hoga
aaj Thahraya hai ḳhud jis ne mujhe qabil-e-dar
kal vahi meri vafaon ko tarasta hoga
saghar-e-chashm men mai-kash use bharte honge
rang jab aap ke chehre se chhalakta hoga
jo nazar uThti hai ban jaati hai ik mauj-e-ḳhumar
dast-e-saqi men koi jaam chhalakta hoga
haal ‘aḳhgar’ ke taḌapne ka suna jab to kaha
us ki fitrat hi taḌapna hai taḌapta hoga
Leave a Reply