uthao haath ki dast-e-dua buland karen
hamari umar ka ik aur din tamam hua
khuda ka shukr baja laaen aaj ke din bhi
na koi vaqia guzra na aisa kaam hua
zaban se kalma-e-haq-rast kuchh kaha jaata
zamir jagta aur apna imtihan hota
khuda ka shukr baja laaen aaj ka din bhi
usi tarah se kata munh-andhere uth baithe
pyali chaae ki pi khabren dekhin nashta par
subut baithe basirat ka apni dete rahe
ba-khair o khubi palat aae jaise shaam hui
aur agle rose ka mauhum khauf dil men liye
dare dare se zara baal pad na jaae kahin
liye diye yunhi bistar men ja ke let gae