subh-dam uth kar tira pahlu se jaana yaad hai
lotna dil ka jigar ka phadphadana yaad hai
yaar tha pahlu men shishe ki pari thi samne
kyuun dil-e-nalan tujhe vo bhi zamana yaad hai
sun ke ahval-e-mohabbat ko mira bola vo shokh
jaan dene ka tujhe achchha bahana yaad hai
lot tha dil qamat-e-dildar par muddat hui
nakhl-e-tuba par tha apna ashiyana yaad hai
kaun dekhe khanda-e-gul ki taraf ai andalib
ek muddat se kisi ka muskurana yaad hai
kya dikhata hai falak abr-e-siyah men ru-e-mah
ham ko balon men kisi ka munh chhupana yaad hai
ho muqabil nala-e-dard-e-dil-e-ushshaq ke
baghban bulbul ko aisa bhi tarana yaad hai
hijr ki shab niind aae ashiq-e-bimar ko
‘muntahi’ tujh ko koi aisa fasana yaad hai