Rahat Indori
mere ashkon ne kai ankhon men jal-thal kar diya
ek pagal ne bahut logon ko pagal kar diya
apni palkon par saja kar mere aansu aap ne
raste ki dhuul ko ankhon ka kajal kar diya
main ne dil de kar use ki thi vafa ki ibtida
us ne dhoka de ke ye qissa mukammal kar diya
ye havaen kab nigahen pher len kis ko khabar
shohraton ka takht jab tuuta to paidal kar diya
devtaon aur khudaon ki lagai aag ne
dekhte hi dekhte basti ko jangal kar diya
zakhm ki surat nazar aate hain chehron ke nuqush
ham ne ainon ko tahzibon ka maqtal kar diya
shahr men charcha hai akhir aisi ladki kaun hai
jis ne achchhe-khase ik shaer ko pagal kar diya
Leave a Reply