go mubtala-e-gardish-e-sham-o-sahar huun main
phir bhi dayar-e-ishq men chiz-e-digar huun main
main chahta huun jis ko vo dilbar tum hi to ho
tum DhunDte ho jis ko vo ahl-e-nazar huun main
pir-e-haram ka qaul hai main shab-gazida huun
pir-e-mughan ki raa.e men nur-e-sahar huun main
ahl-e-chaman ki kashmakash-e-rozgar ki
tariki-e-hayat men misl-e-qamar huun main
raushan mire vajud se sarv-o-saman hue
sehn-e-chaman ke vaste nur-e-sahar huun main
main manta nahin ki vo ghaflat-shi.ar hai
rasm-e-vafa ke zer-e-asar kis qadar huun main
ummid kar raha huun main takmil-e-shauq ki
kis ko bata.un kis qadar ashufta-sar huun main
go main rah-e-hayat men be-dast-o-pa hua
phir bhi muhit-e-ishq men mahv-e-safar huun main
mera muqabla nahin parvaz-e-fikr men
halanki josh-e-ishq men be-bal-o-par huun main
arz-o-sama ke raz-e-darun se huun ashna
goya sharik-e-mahfil-e-shams-o-qamar huun main
mujh ko ḳhabar hai kya hai pas-e-parda-e-namaz
go shaiḳh ka ḳhayal hai ki be-ḳhabar huun main
Leave a Reply