phenk yuun patthar ki sat.h-e-ab bhi bojhal na ho
naqsh bhi ban jaa.e aur dariya men bhi halchal na ho
khol yuun muTThi ki ik jugnu na nikle haath se
aankh ko aise jhapak lamha koi ojhal na ho
hai safar darpesh to parchha.in ki ungli pakaḌ
raah men tanha.i ke ehsas se pagal na ho
pahli siḌhi pe qadam rakh aḳhiri siḌhi pe aankh
manzilon ki justuju men ra.egan ik pal na ho
zehn ḳhali ho ga.e hain vaqt ke ehsas se
samne vo mas.ala rakh jis ka koi hal na ho
sab ke hi sinon men hai phaila hua sanson ka habs
koi shahr aisa nahin jis ki faza bojhal na ho
log akasr apne chehre par chaḌha lete hain ḳhol
tu jise sona samajhta hai kahin pital na ho
justuju us peḌ ki kyuun ho ki jo saaya na de
haath us Daali pe kya pahunche ki jis par phal na ho
roz-o-shab lagta rahe sochon ka mela zehn men
shor se ḳhali kabhi ehsas ka jangal na ho
garm kar ‘sajid’ lahu ko dhimi dhimi aanch se
vaqt se pahle tire jazbat men halchal na ho
Leave a Reply