Saqib Lakhnavi
tez mujh par jo sitamgar ki chhuri hoti hai
kijiye kya ki lagi dil ki buri hoti hai
man.a karta hai taḌapne se qafas men sayyad
naale karta huun to gardan pe chhuri hoti hai
har badi karti hai insan ko duniya men halak
sam-e-qatil hai vo aadat jo buri hoti hai
ahl-e-dil ishq men dam maar saken kya mumkin
rag-e-jan ke liye har saans chhuri hoti hai
baiTh kyuun bada-kashon men ki hon gum hosh-o-havas
sohbat-e-ahl-e-ḳharabat buri hoti hai
Leave a Reply