Dard Degi KHun Ke Aansu Rulaegi Mujhe

dard degī ḳhuun ke aañsū rulā.egī mujhe

zindagī tū aur kis had tak satā.egī mujhe

bhuuk se behāl maiñ bhī ek din ho jā.ūñgā

ek din ye bebasī dar dar phirā.egī mujhe

maiñ chalā jā.ūñgā jis din āsmānoñ kī taraf

dekhnā ro ro ke ye duniyā bulā.egī mujhe

ik yahī to baat us kī hai mujhe behad pasand

ruuTh jā.ūñ maiñ to vo aa kar manā.egī mujhe

kuchh dinoñ ke baad maiñ bhī ḳhaak meñ mil jā.ūñgā

kuchh dinoñ ke baad tū bhī bhuul jā.egī mujhe

Leave a Comment