dard degi ḳhuun ke aansu rula.egi mujhe
zindagi tu aur kis had tak sata.egi mujhe
bhuuk se behal main bhi ek din ho ja.unga
ek din ye bebasi dar dar phira.egi mujhe
main chala ja.unga jis din asmanon ki taraf
dekhna ro ro ke ye duniya bula.egi mujhe
ik yahi to baat us ki hai mujhe behad pasand
ruuTh ja.un main to vo aa kar mana.egi mujhe
kuchh dinon ke baad main bhi ḳhaak men mil ja.unga
kuchh dinon ke baad tu bhi bhuul ja.egi mujhe
Leave a Reply