Dil Ke Hote Bhi Kahin Dard Juda Hota Hai

Saqib Lakhnavi

dil ke hote bhi kahin dard juda hota hai

ik faqat maut ke aa jaane se kya hota hai

zulm se zikr-e-vafa aur siva hota hai

un ki har ek bura.i men bhala hota hai

shohda ne.mat-e-duniya ki talab bhuul ga.e

ḳhuun ke ghunT men aisa hi maza hota hai

ḳhud-faramoshi-e-ulfat hai ilaj-e-gham-e-dahr

be-ḳhabar hosh men aana hi bura hota hai

imtihan-gah tiri mahfil-e-dilkash hai magar

main bhi dekhun ki koi dil ke siva hota hai

tum se kahta huun mira ḳhuun mire dil pe sahi

rasm-e-duniya hai ki apnon se gila hota hai

bazm se uTh to chala main ki mahal tha lekin

rone valon se bhala koi ḳhafa hota hai

dekh hi lete hain sab naz-o-ada ki surat

aa.ina aap ka naqsh-e-kaf-e-pa hota hai

nala-e-dil ke asar ka na karo mujh se gila

mujh ko kya ilm ki kis tarah rasa hota hai

tauba tauba hai yahi ishq ki batil nazari

sang but-ḳhane men aate hi ḳhuda hota hai

kya sabab kuchh tujhe ma.alum hai ai abr-e-bahar

dil ke murjhane se kyuun zaḳhm hara hota hai

vo kahen ya na kahen main huun asar se vaqif

bol uThta hai vo naala jo rasa hota hai

raushni din ki abhi hai ki hain kho.e hue hosh

dekhna hai shab-e-tarik men kya hota hai

hijr ke dard ko baḌhne de ki hai muzhda-e-vasl

vahi ghaTta hai jahan men jo siva hota hai

bad-nasibi ho to har ḳhuub ki ḳhubi hai fuzul

sub.h ka vaqt sitaron ko bura hota hai

dil to dil sar bhi kabhi hota hai mamnun-e-firaq

jis men hai ishq ye sauda vo juda hota hai

mire raazi ba-raza hone se sab raazi hain

varna jo hai vo shikayat se ḳhafa hota hai

avvalin marhala-e-ishq hai jab hasrat-o-maut

koi batla.e ki phir ba.ad men kya hota hai

bim-o-ummid se kis tarah nikal ja.un ki dil

na Thaharta hai jahan men na fana hota hai

muntazir naza.a men chup hai to use chup na samajh

dam ka ruk ruk ke nikalna bhi gila hota hai

shab-e-tarik men nikla to hai dekhun ‘saqib’

na-rasa rahta hai naala ki rasa hota hai