Sardar Panchhi
tum ho mujrim ham hain mulzim chalo naya insaf karen
tum bhi hamen muafi de do ham bhi tumhen muaaf karen
phir ujli kursi par baiThen mulzim ka insaf karen
pahle munsif ganga-jal se apni niyyat saaf karen
jis ne jitne qatl kiye hain un ka vo iqbal kare
main maqtulon se kah dunga ab vo use muaaf karen
ye bhi marham hai zaḳhmon ka hakim aur jallad sabhi
danga-piḌit har basti ka nange pair tavaf karen
kuchh zahrile aḳhbaron ne sab ko mere ḳhilaf kiya
un men himmat ho to mere rab ko mire ḳhilaf karen
aane vaali naslon ko ye deti rahengi dars-e-vafa
na.e musavvir tasviron men mera lahu muzaf karen
ik-duje ke aansu le len ik-duje ko ḳhushiyan den
pyaar ki sham.a ka ye ujala aao har atraf karen
vote na bechen kyuun bechare bas kambal ke badle men
jo sardi men apni chamḌi bistar karen lihaf karen
taḳht-nashinon ke qadmon par bose dene vaale ab
ek nazar meri qurbani par bhi to ausaf karen
badal farz-shanas nahin hai qaid hai ya zanjiron men
shabnam ke qatre hi pyase ‘panchhi’ par altaf karen
Leave a Reply