kya is ka gila kiije use pyaar hi kab tha
vo ahd-e-faramosh vafadar hi kab tha
us ne to sada puuje hain uḌte hue jugnu
vo chand-sitaron ka parastar hi kab tha
ham Duub ga.e jagti raton ke bhanvar men
haath us ka hamare liye patvar hi kab tha
aamon ki hasin rut ke siva bhi to vo kuuke
lekin kisi koyal ka ye kirdar hi kab tha
avaz jo main duun to kisi aur ko chhu le
is ankh-micholi se vo bezar hi kab tha
tum us ko bure naam se yaaro na pukaro
ye naam use ba.is-e-azar hi kab tha
mash.hur-e-zamana hain ‘qatil’ us ki uḌanen
vo dam-e-mohabbat men giraftar hi kab tha
Leave a Reply