Azhar Ghauri
faza men aaj hai taari fasurdagi kitni
hai dil-gudaz anadil ki bebasi kitni
chalo jala.en har ik samt agahi ke charagh
yahi hai vaqt ki har su hai tirgi kitni
na andhiy.on ke thapeḌe bujha sake us ko
charagh-e-rahguzar men thi zindagi kitni
nazar lage na kahin ab hava se laḌta hai
mizaj-e-yar men hai aaj barhami kitni
lapaT lagi jo mahal men use to chiḳh uTha
jala ke shahr hui thi use ḳhushi kitni
kaha na tha ki masa.ib ka karobar na kar
magar thi teri siyasat men sar-kashi kitni
zamane bhar ke andhere shikast de na sake
us ik charagh men ‘az.har’ thi raushni kitni
Leave a Reply