charagh jab se mire tirgi se haar ga.e
hava se haath milane ko saare yaar ga.e
har ek baar safar mera muḳhtasar kyuun tha
safine mujh ko hi sahil pe kyuun utaar ga.e
tiri sara.e men saman kahan sukun ka tha
kisi tarah se musafir bhi shab guzar ga.e
main jin ko saa.e men rakhta tha tapte sahra men
ghazab hai log vahi mujh pe sang maar ga.e
hui jo shaam to lauTe vatan men apne hi
parinde yuun to bahut sarhadon ke paar ga.e
burida-sar hi nahin the lahu men Duube hue
suna hai neze adu ke bhi ashk-bar ga.e
badan pe sab ke qaba.en thiin surḳh ankhon ki
ajab tarah se ḳhizaon men gul-e-ezar ga.e
Leave a Reply