Raste Ke Pech-O-Kham Kya Shai Hain Socha Hi Nahin

raste ke pech-o-ḳham kya shai hain socha hi nahin

ham safar par jab se nikle muḌ ke dekha hi nahin

do ghaḌi ruk kar Thahar kar sochte manzil ki baat

raste men koi aisa moḌ aaya hi nahin

zindagi ke saath ham nikle the le kar kitne ḳhvab

zindagi bhi ḳhatm hai mausam badalta hi nahin

ik diya yadon ka tha raushan thi jis se bazm-e-shab

jaane kya guzri kai raton se jalta hi nahin

zindagi bhar pai-ba-pai ham ne kurede apne zaḳhm

ham se chhuT kar us pe kya guzri ye socha hi nahin

aarzu thi khinchte ham bhi koi aks-e-hayat

kya karen ab ke lahu ankhon se Tapka hi nahin

is tarah kaise ho ‘ajmal’ chara-e-dil ki ummid

dard apna aḳhiri had se guzarta hi nahin

Leave a Comment