udaas dil ko mohabbat ka aasra degi
vo mujh ko chhu ke mira hausla baḌha degi
zara si baat sahi us ka dekhna lekin
zara si baat miri niind hi uḌa degi
vo dam darud ki aadi hai aur mujhe shak hai
vo apna pyaar mujhe ghol kar pila degi
tum us ki raushni takne men gum na ho jaana
vo ek lau hai tumhen aag bhi laga degi
sabhi alarm ghaḌi ke fuzul ja.enge
kisi ke paanv ki aahaT mujhe jaga degi
tu mere samne chup rahna aur dil ki baat
tumhare chehre ki rangat mujhe bata degi
kisi ke pyaar ki mehndi laga le hathon par
mahak na degi magar rang to chaḌha degi
main janta huun vo saḌyal mizaj hai ‘tahsin’
magar vo meri ghazal sun ke muskura degi
Leave a Reply